தினம் தினம் பல முறை

ஒலிக்கிறது என் வீட்டு அழைப்பு மணி ..

வாடகை வாங்க வரும் வாசல் பெருக்குபவர்...

குப்பை எடுத்து போக வரும் துப்புரவு பணியாளர்....

புதுப்புது கீரைகட்டுகள் இறக்கி வைக்கும் கீரைக்காரி...

விளம்பரங்களுடன் வரும் விற்பனையாளர்கள் ..

பிறந்தநாள் இனிப்பு கொடுக்கும் பக்கத்துக்கு வீட்டு குழந்தை ..

பேப்பர் கேட்கும் எதிர் வீட்டு தாத்தா...

கடிதங்கள் கொடுத்துப் போக வரும் புதுமுகங்கள்...

அன்னதானம் அன்பளிப்பு கேட்டு வரும் பக்தகோடிகள் ..

எப்போதாவது எட்டிப் பார்க்கும் சொந்த பந்தங்கள்...

ஒவ்வொரு முறையும் உன் முகம் எதிர்பார்த்து திறக்கும்

என் கதவுகள் ...

இருந்தும் வரவில்லை -

நீ

இன்று வரை ...

என் அறைக்குள் மட்டும்

விரிந்து கிடக்கிறது என் வெளி..

வழிததடங்களே இல்லாத

பாதைகளில்

சென்று கொண்டிருக்கிறது

இலக்குகளற்ற என் பயணங்கள்..

முடிவில்லாத மணித்துளிகளாலாகி

நகர மறுக்கின்றன என் நீண்ட நாட்கள்..

கல்லறையின் வாயிலில் அமர்ந்து

வாழ்க்கையின் மீதியை

ஊடுருவிக்கொண்டிருக்கும்

என் எண்ணங்கள்..

மனந்திறந்த சிரிப்புகளின் ஊடே

இதயம் வலிக்க ரகசியமாய் உருளும்

என் கண்ணீர்த் துளி..

உறக்கங்கள் மறக்கப்பட்ட

பகலைப் போன்ற என் இரவுகள்..

இத்தனை முரண்பாடுகள் இருப்பினும்

உயிர் தின்று கொண்டிருக்கும் நோய்

உள்ளிருந்தும்

அறியாதிருப்பவனைப் போல்

சாதாரணமாக சென்றுகொண்டிருக்கும்

அன்றாட வாழ்க்கை..

எழுதப்படாத வெற்றுத் தாளாகவே
இருக்கிறது வெகுநாட்களாய் -
உனக்கான என் கடிதம்..
எந்த புள்ளியில் இருந்து தொடங்குவது
வார்த்தைகளில் விவரிக்க முடிந்த
உணர்வுகளை மட்டும்..
எத்தனை தருணங்களை
நினைவு கூர்வது உனக்கு
எடுத்து சொல்ல..
எத்தனை வார்த்தைகளைத்
தேடுவது என் நினைவுகளைப்
பதிவு செய்வதற்கு..
என் கனவுகளையும் புன்னகைகளையும்
கண்ணீரையும் எத்தகைய வாக்கியங்களில்
உணர்த்திவிட முடியும்...
ஒவ்வொரு வரிக்கான காரணங்களையும்
கதைகளையும் சொல்வதற்கே
ஒரோர் கடிதங்கள் தேவைப்படுமே..
எனினும்
வெற்றுத்தாளாகவே தான்
அனுப்பப்படுகிறது
முடிவில் - எழுதப்படாத உணர்வுகளும்
புரிந்துகொள்ளப்படும்
என்ற நம்பிக்கையோடு..

உன்னை வந்து சேர்கிறதா

இங்கு நான்

காற்றில் கொடுக்கும் கணக்கில்லாத முத்தங்கள் ..

அறிகிறாயா உன்னை உணரும் போதெல்லாம்

மலர்ந்திடும் என் புன்னகையை ..

கணிக்கமுடிகிறதா இந்த

குளிர்காற்றில் தேவைப்படும் உன்

கதகதப்பு...

கேட்கிறதா காலையில் எழுந்ததும்

கண் திறக்காமல் கையசைத்து

மெல்ல உன்னை அழைப்பது ..

தெரிந்திருக்கிறதா அவ்வப்போது

நான் தனியாக உளறிக்கொள்ளும்

சிணுங்கல்கள்..

அனுபவிக்கிறாயா உன் நினைவுகளால்

தூக்கமில்லாமல் புரளும்

என் நீண்ட இரவுகள்...

உணரமுடிகிறதா அவ்வப்போது

உருண்டோடும் என்

கண்ணீர் துளிகளின் ஈரம்.. .

புரிந்திருக்கிறதா உன் பிரிவு
ஏற்படுத்தும் என் உயிரின் வலி ..

உனக்கான
எனது கடிதங்கள்
அனுப்பபடுகின்றன
முகவரி இருக்குமிடத்தில்
மட்டும் காலியாக..
உன்னை சேராத மடல்களுக்கு நீ வரையும் பதில்களை
ஆவலுடன்
எதிர்நோக்கி கொண்டிருக்கும்
நான்...